In Love

الظلم كمين فى النفس البشرية الضعف يخفيه والقوة تظهره

Monday, April 21, 2008

u tell me to stop talking
but u don't know that the feeling inside my heart when i do this
is killing me
burning me so slowly
i'm so bored of ups and downs
i wanna rest pleeease
my rest is between ur arms
my rest is in ur heart
my rest is ur smile
ur bright eyes
ur simple touch
i want my rest
YOU

Thursday, April 10, 2008

الامس مر الى غير رجعة
غدا ربما لن يأتى
اللحظة هى الان

Sunday, March 23, 2008

كل سنة وانتى طيبة يا امى
كل سنة وانتى طيبة يا احلى ام فى الدنيا
كل سنة وانتى معايا وعلى طول معايا يا اجمل ام فى الدنيا

Saturday, March 22, 2008

الحب والخوف اخوان لا يفترقان
الحب هو الاخ الاكبر والخوف هو الاخ الصغير الذى لا يستطيع على فراق اخيه الكبير
فهما احساسان لابد من تلازمهما معا
اللى بيحب بيكون خايف على حبيبه
بيكون خايف لا يضيع منه
بيكون خايف لا يبعد عنه
بيكون - احيانا - خايف منه
اللى بيحب بيخاف على حبيبه حتى من نفسه
بيخاف عليه اكتر من نفسه
بيخاف عليه من نسمة هوا معدية
بيخاف عليه من اى حد يبصله
بيخاف عليه من اى حاجة وكل حاجة
احساس جميييييييييل بل احلى احساس فى الدنيا ولكن للاسف
دايما يرافقه احساس من اسؤأ الاحاسيس اللى ممكن الواحد يحسها
يارب سترك ورضاك

Saturday, February 16, 2008

بحبك يا اغلى انسان فى الوجود
بحبك يا احلى ملاك موجود
بحبك الى ابعد الحدود
عشانك احطم كل السدود
مش مستنية اى ردود
كفاية انى بحبك

Friday, February 08, 2008

ان الانسان وسط بين الذرة والمجرة والانسان هو الكائن الوحيد -حتى الان- الذى يعرف انه يعرف
ويعرف انه يدرك الكون
وان الكون نفسه لا يدرك نفسه
ولكى يدرك نفسه لابد ان تكون هناك عقول كانت خلايا يوما ما
بقلم انيس منصور

Tuesday, February 05, 2008

اذا شئت ان تحيا سليما من الاذى
وحظك موفور وعرضك صين
لسانك لا تذكر به عورة أمرئ
فكلك عورات وللناس اعين
الامام الشافعى

Friday, February 01, 2008

الحمدلله
الاخبار الحلوة كتيييييييييير
طبعا خلصت امتحانات وده فى حد ذاته خبر ممتاااااز
عدت بمرها ومرها ( اصل مفيش حلوها ) والحمدلله
اخويا الكبير خطب
لولولولولولولولولولولولولولولولىىىىىىىىىىى
الدنيا مكانتش سايعانى من الفرحة
اخويا الكبير ده مثلى الاعلى وبالنسبة لى مش بس اخ
ده صديق واخ واب
ربنا يتممله بخير يارب

Saturday, January 05, 2008

شغالة فى العد التنازلى من اول الامتحانات
لغاية دلوقتى عدى امتحانين من امتحانات الترم الاول لاخر سنة فى الكلية ان شاء الله
بس بعد ماخلصوا بدأت اشك انها اخر سنة وربنا يستر
نبدأ بالامتحان الاهون نوعا ما اللى هو التانى كان شغال والشفوى شغال وعدى والسلام
بعد ماطبعا كتبولنا فى اول الامتحان ان درجات العملى هتظهر كمان كام يوم
وعلى المتضرر اللجوء للقضاء قصدى تقديم شكوى واعادة تصحيح وكلام من ده
فيما معناه ( درجاتكوا زبالة يا كلاااااااااااااااااااااب واللى عنده كلمة يخبط راسه فى اتخن حيط) تمت الترجمة
اما الامتحان الاولانى والله اعلم كان النسخة المكتوبة من فوازير رمضان للعام الهجرى 1550 ان شاء الله
بطولة شريهان
نيللى
نادين
ليلى علوى
حمدية حسنين
كاميليا امين
وانا وانت وسمعنى احلى سلام
بدأ الامتحان بعد ما الواحد اتهرى فى المذاكرة وياريته مابدأ
الصفحة الاولى من 15 صفحة تنحت فيها نص ساعة من وقت الامتحان اللى هو 3 ساعات
ومخلصتش
بس كنت جبت اخرى منها
قلت مش مشكلة الباقى هيبأى كويس ان شاء الله
قلبت الصفحة ودى الحاجة اللى هفضل اندم عليها عمرى كله
انى الاقى سؤال واحد ؟!!!!! ابدااااااا
كلها فوازير فوازير فوازير
فواااااااااااازييييييييييييييييييييييييير
مفيش سؤال يقول انا عايز كذا
ولا هاتلى كذا
ولا اعمل كذا
محدش قاللى انهم اخترعوا ادوات استفهام جديدة
بس اصحابى قالولى لما خرجت من الامتحان
خلصت الامتحان لحد اخر صفحة فى نص ساعة
متستغربوش
مانا جبته من الاول بأى عشان ابدأ احل
الفت تألييييييييييف
ولا نجيب محفوظ فى عز شبابه
الدكتور اللى هيصحح ورقتى ممكن يجيله صدمة عصبية
او ممكن يكون ابن حلال ويبعت ورقة الامتحان بتاعى للناس المسئولين عن جايزة نوبل
خلصت الامتحان فى ساعة كمان
فاضل ساعة من وقت الامتحان
جبت الورقة من الاول تاااالت
كملت تأليف
ولاول مرة من يوم مادخلت الكلية اخرج من الامتحان فى معاده
دى طبعا عجيبة من عجائب الدنيا العشرتاشر ( الا هما بأوا كام اليومين دول؟) ماعلينا
اللى نزل عليا فى الامتحان انى قعدت اقلب فى الورقة وااااااااااااااااااااااااضحك
والدكتور المراقب يبصلى اوى كده
زى مايكون عايز يقول تحبى اجيبلك مهدئ؟
او اعرضك على دكتور امراض عقلية وعصبية ونفسية ومهلبية
خرجت من الامتحان مش اسكت بأى ؟ لاااااااااااااااااااااااااااااااااااااا
هااااااااااااااااااتك يا ضحك لدرجة انى مكنتش قادرة اتنفس من الضحك
وع الحال ده لحد ماروحت طبعا بعد ماخرجت اتفسح واروق نفسى
ما اصل محدش واخد منها حاجة
فااااااااااااااااانيااااااااااااااااااااة
ومادايم غير وجه الله
ومن قدم شئ بيداه التقاه
ويابختك يا مصحح الورق وانت مغمض عنيك يا فاعل الخير والثواب

Friday, December 21, 2007

ما أحلى الحياة الزوجية
.
.
.
.
.
.
.
.
.
.
.
.
.
.
حتى الان :)

Tuesday, December 18, 2007

كل عام والامة الاسلامية بالف خير وصحة وسعادة ونصر للاسلام
اعاد الله العيد علينا بالخير واليمن والبركة ان شاء الله
ويارب السنة الجاية ان شاء الله نكون على عرفة
ويكون كل واحد حقق اللى نفسه فيه
واكون اتجوزت :)

Saturday, December 15, 2007

اخر امتحان عملى فى اول ترم من اخر سنة خلص النهارده
هييييييييييييييييييييييييييييييييييييييييه
انا مش عارفة انا مبسوطة ولا زعلانة
انا عايزة اخلص الكلية ولا لأ
الكلية والدراسة مش هتوحشنى عشان انا هفضل ادرس طول عمرى (قدرى) بس هتوحشنى الصحبة
وخصوصا انى مغتربة يعنى ليا اصحاب عايشين معايا اكتر من الاخوات ومن بلاد مختلفة
اتعودت اشوفهم اكتر مابشوف اهلى
اعمل ايه من غيرهم
منهم اللى من بورسعيد معايا ومنهم الل من براها
فى القريب وفى البعيد
ده غير اصحابى اللى فى الكلية
انا عارفة ان دى سنة الحياة بس بجد الموضوع مضايقنى اوى
صحيح كلها شهور واخلص ان شاء الله واتجوز ان شاء الله
ودى الحاجة الوحيدة اللى مصبرانى
يارب قدرنى

Wednesday, December 12, 2007

ايام الامتحانات تااااااااانى
خنقة الامتحانات حسستنى انى مجنونة
ساعات اهزر واضحك واقلبها تهريج وتهييس لحد ما اتعب من كتر الضحك
ساعات اتخنق ومبقاش طايقة نفسى حتى
لكن المهم انى عارفة ان فى اكتر من حد مستعد يسمعنى فى اى وقت وفى كل وقت
اما انى احس ان مفيش حد بيسمعنى ده احساس بيقتلنى
لما احس ان اشخاص من اقرب الناس ليا مش قادرين يفهمونى وانا نفسيتى مش مظبوطة الاحساس ده بيموتنى فى الثانية الواحدة الف مرة
ربنا يزيله عنى يارب
ربناما يعيده تانى ابدا يارب

Thursday, November 01, 2007

رجعنا للدراسة تانى وبدأنا الجد
مش عارفة ادخل فى موود الدراسة تانى
يمكن عشان اصحابى اللى ادى خلصوا وانا لسه
مش عارفة لزمتها ايه السنة الخامسة فى الكلية
والله مافى حاجة جديدة بناخدها
امال الترم التانى بأى هنعمل ايه
زمان فى المدرسة كانوا ساعات بيعملوا يوم رياضى
تقريبا الترم التانى هيكون كله رياضى
مش قادرة ومش عايزة اذاكر تانى خلاااااااااااااااااااااااااااص
زهقت واتخنقت

Saturday, October 13, 2007

عندما انظر لنفسى فى المراَة ارى نفسى باشكال مختلفة
احيانا ارانى طفلة صغيرة متعلقة بكل شكل من اشكال الحنان
احيانا اخرى ارانى سيدة عجوز وحيدة تبكى اياما مضت
واحيانا ارانى سيدة عجوز محاطة باولادى واحفادى من كل الاعمار
واحيانا ارانى سيدة فى منتصف العمر سعيدة فى حياتى وفى عملى
كلها صور مختلفة
التشابه الوحيد بينهم هو انها انا فى كل الاحوال

Friday, October 12, 2007



كل سنة وانتم طيبين ويارب السنة الجاية تكون احسن واحسن

ربنا ينول كل واحد اللى فى باله طالما خير

وماتنسوش الكحك والبسكوت

Check out my Slide Show!

Saturday, October 06, 2007

بدون تعلييييييييييييق
مسلسل قضية رأى عام بطولة يسرا
مشهد بين يسرا و سامى العدل
سامى العدل : الاوامر اللى جاية لنا من فوق بتقول كل الناس متساويين (بالعربى يعنى ابن الوزير زى ابن البواب
يسرا ( وهى سرحانة ) : الحمدلله الدنيا لسه بخير
وعجبى.....

Thursday, October 04, 2007

how strange the way u change my mood !!!!!
in the morning i'm so happy
in afternoon i'm so angry
at night i'm allright
then in midnight i'm so broken
all this in just one day
what else will u do to me ?!!!!!
but isn't that love????
crazy moody unstable amazing fabulous feeling!!!

Friday, September 14, 2007

ياااااااااااااااااااااااااااه
السنين عدت وكبرنا
انا فاكرة فى اول سنة فى الكلية اللى كان يقوللى انا فى بكالوريوس كنت اقول ماشاء الله
عقبالنا يارب
بكالوريوس دى بعييييييييييييييييدة اوىىىىىىىىىىى
ماكنتش اعرف انها قريبة للدرجة دى
رحت الكلية من يومين
واحدة فى سنة اوى وقفت تتكلم معايا انا ويارا انتيمتى اول ماعرفت انى فى سنة خامسة
قالتلى يابختك بجد؟؟؟؟
ومش مصدقة نفسها ان فى حد فى بكالوريوس
فكرتنى بنفسى اوى
معقول 5 سنين عدوا بالسرعة دى
فى الاول كنت عايزاهم يعدوا هوا
دلوقتى عايزاهم يبطأوا شوية عشان كده الباقى هيعدى اسرع
على اد ماكان فى حاجات مش لذيذة فى الايام دى بس بجد كان فيها حاجات كتييييييييير حلوة
عشان كده احب اقول للى لسه داخل الكلية اتمتع بكل لحظة
كل ثانية هتعدى عليك لازم تتعلم ازاى تستفيد منها وتخليها لحظة تحب تفتكرها

Thursday, September 13, 2007

رمضان غريب اوى من غير اخواتى
مع ان وهم موجودين كتير بنتخانق زى اى اخوات بس بجد وحشونى اوى
وحاسة بوحدة من غيرهم
ساعة الفطار مش عارفة اكل حاسة بفراغ كبير حواليا وخصوصا ان ايمن مش موجود هو كمان
ربنا يرجعهم كلهم بالسلامة يارب

Wednesday, September 12, 2007

اخيرا رمضاااان

الشهر اللى كلنا بنستناه من السنة للتانية

كل سنة وانتم بالف خير وربنا يجعله شهر مبارك علينا كلنا ان شاء الله

Tuesday, September 04, 2007

من زمااااااااااااااااااااااان مكتبتش اى حاجة
يمكن عشان كنت مشغولة اوى
اتشغلت بحاجات كتير منها الحلو ومنها اللى مش حلو
الحمد لله على كل حال
طبعا اهم خبر حصل الفترة اللى فاتت هو عقد قرانى والحمد لله
احساس تانى خالص غير الخطوبة
احساس ان كل حاجة مظبوطة
مفيش حاجة مضايقانى
راحة نفسية والحمد لله
من الاخبار التانية الحلوة نجاحى بتقدير جيد جدا والحمدلله
ويبأى اخيرا رايحة بكالوريوس صيدلة
من الاخبار اللى مش حلوة صدمتى فى واحدة من اعز اصحابى
ومن الاخبار اللى برضه مش حلوة واللى كانت مخليانى مش طايقة حتى انى ادخل النت
احساس مرير حسيته انى بتمنى حاجة مكانش ابدا نفسى اتمناها
ربنا مايعيد الاحساس ده تانى :(
ولى عودة ان شاء الله

Wednesday, March 21, 2007


يعنى ايه أم؟!!!

سؤال سهل مش كده؟

!!!!!!

طب حد يجاوب

وانا هستنى الاجابات

اجابتى :

أم يعنى عطاء , يعنى حب بدون انتظار اى مقابل

أم يعنى تضحية حتى اخر لحظة , يعنى حضن يضمنى فى اى وقت انا عايزاه

أم يعنى حنان مالوش نهاية , يعنى ايثار باى شئ

أم يعنى كل اللى اتعلمته فى الدنيا

أم يعنى كل اللى لسه هتعلمه

أم يعنى دنيتى وما فيها

أم يعنى قلب وعقل حاسس بيا وفاهمنى من غير ماتكلم

أم يعنى ويعنى ويعنى ................

كل حاجة

ربنا يخليكى ليا يا ست الحبايب

Labels:

Thursday, March 01, 2007



Everytime you do the same


I want you to change your way


I want you to change your thoughts



or think in another way



I want you to be the best



I want you to reach stars with me



You are my strength when i'm weak



You are my voice when i can't speak



You are my eyes when i can't see



You are the best thing happened to me





I wish to be together forever


هو ايه اللى بيحصل؟؟؟

معقول!!!!!!!!!

بتروح منى صداقة سنين؟؟؟

خايفة لا يكون الكلام ده بجد

ولا انا بيتهيألى ؟!!!!!!!!!!

معقول؟؟؟؟؟

واحدة تانية تاخد مكانى عندها

ولا ده مجرد وهم؟؟؟؟؟؟

المشكلة ان التانية دى صاحبتى وبحبها جدا

ونفسى كلنا نفضل اصحاب على طول

ونفسى هما الاتنين يفضلوا اصحاب دايما

بس مش تاخد مكانى

هل دى انانية منى؟

ولا ده حقى؟؟؟


انا بجد مش عارفة انا محتارة اوى

اعمل ايه ياربى وايه الحل

ده حقيقة ولا اوهام؟؟؟؟؟؟؟؟؟!!!!!!!!!!!


انا حاسة انى بلف حوالين نفسى

مشاعر متضاربة

مش عارفة اسيطر عليها


بلف فى دايرة مغلقة

بلف فى دوامة
خلاص بقيت حكاية الكل بيحكى عنها
ربنا يصبرنى على العيشة دى ويريحنى منها
طالما اقرب الناس مش فاهمنى هستنى مين يفهمنى
خلاص مش عايزة حد يفهم عشان الموضوع مايتفهمش
الموضوع يتحس وبس
لما اقول ربنا يوريهم اللى انا فيه
والله بدعيلهم
حتى لو هم شافوا انى بدعى عليهم
الوقت اللى عدى على خير مجاش من الهوا
الحمد لله

Sunday, January 28, 2007

بعد غياب لازم اكتب عن يوم من اغرب ايام عمرى
كان يوم عيد ميلادى
كل سنة بيتهيألى ان محدش هيفتكر عيد ميلادى
وببأى غلطانة كل سنة
ولله الحمد كل سنة اللى بيفتكرونى بيكتروا
السنة دى كان مختلف عشان الناس كانول مختلفين
الناس اللى احتفلوا معايا بعيد ميلادى والطريقة اللى احتفلوا بيها كانت مختلفة
الاصحاب هم هم بس العلاقة بقت اقوى
المكان هو هو بس بأى اقربلى عشان فيه اصحابى
الطريقة مش هى هى
السنة اللى فاتت التورتة كانت عبارة عن كيس شيبسى فى صينية وفى النص شمعة وكنت فرحانة جدا
عشان الناس مش عشان التورتة
السنة دى كان عيد ميلاد بجد وتعورتة وشمع بجد والناس كانت اقرب بجد
الفرحة خلتنى مش عارفة اتحرك من مكانى
احساس مختلف نهائى
بجد بقيت من جوايا بدعى ربنا يخلينا مع بعض على طول
صديقاتى العزيزات يارا ونسمة وبسنت
طبعا عشان يجيبولى كل سنة تورتة مش اكتر يعنى
ههههههههه

Monday, January 01, 2007

كل سنة وانتم طيبين
العيد والسنة الجديدة مع بعض يادى الهنا اللى احنا فيه
الواحد هيفكر فى ايه ولا ايه
اصل بعيد عنكم تقريبا انا اتجننت
كل عيد لازم افكر ياترى عملت ايه مفيد فى الدنيا من العيد اللى فات لغاية دلوقتى
وياترى عملت ايه وحش فى حياتى او فى حياة حد تانى
وياسلام بأى لو لقيتنى عملت حاجة وحشة فى حياة حد تانى غيرى بيبأى يوم مايعديش
الا لما اكلم الانسان ده واطمن من تصحيح الوضع
ده بالنسبة للعيد اما السنة الجديدة فده موااااال
لازم افكر فى السنة اللى فاتت بكل تفصيل فيها بحلوها وبمرها
وافكر فى السنة الجاية ياترى نفسى فى ايه؟ ومتوقعة ايه على المستوى الشخصى والاجتماعى والعالمى والعلمى
افكر فى اصدقاء السنة اللى فاتت ان كان راح منهم حد او جاء عليهم حد جديد
وافكر ياترى مين هيفضل معايا ومين هيبقالى ومين هيبقى عليا
ياترى اصدقائى القريبين هيفضلوا قريبين لان الموضوع ده بيخوفنى جدا
ياترى ....ياترى ......ياترى
مليون ياترى بحتار فيهم وبخاف منهم احيانا
ربنا يجعلها سنة سعيدة على الامة الاسلامية وعلى كل الناس امين

Tuesday, December 19, 2006


اريد حلا ....

ايه العمل لما يكون الواحد مخنوق ومش طايق نفسه من مليون حاجة
مش حاجة واحدة ممكن تتحل .... لا دى حاجات كتيييييييير
لو حد عنده حل غير انه يقوللى ماتفكريش وانسى والكلام ده كله ياريت يلحقنى بيه
لانى على وشك الانهيااااااااااااااااااااااار

Thursday, November 16, 2006

واخيرا زست....
من زماااااااااااااااااان ماكتبتش حاجة فى المدونة وده لأن الدراسة والكلية ربنا يخليهالنا قايمة بالواجب وزيادة
بعد اسبوعين من الدراسة اللذيذة فى مصر اللى مش لذيذة توصلت للقرار التالى:
تؤمم الشركة العالمية .... لا قصدى اقول
مادة واحد:فى ظل قاهرة المعز لدين الله الدراسة لا استحمال لها
مادة اتنين: الدراسة بكلية الصيدلة دماااااااااااااااار شامل يستحق حظره
مادة تلاتة: بعد عدد لا بأس به من المواقف مع دكاترة الكلية الجبابرة تقرر اللجوء الى الله عز وجل الوحيد القادر عليهم وحسبى الله ونعم الوكيل وحسنة قليلة تمنع بلاوى كتيرة ويا بختك يا فاعل الخير والثواب
مادة اربعة: كرهت نفسى وكرهت عيشتى وكرهت كل حاجة فى الدنيا ما عدا اكيد الله ورسوله واهلى وبورسعيد فقط لا غير
وبناء على ذلك قررت الاتى: لا حياة مع الصيدلة ولا الصيدلة مع الحياة
مالها الاعشاب الطبيعية ؟ وحشة ؟ ابدا... هيحصل ايه لو طلعت عطارة يعنى؟ ولا حاجة
هرتاح من وجع الدماغ ده

معلش لو الكلام عجيب وكله تهييس بس ده لازم لأنه طالع من واحدة جاية طازة من القاهرة من اقل من ساعة
ببص لشاشة الكمبيوتر من وراء الستار اللى هو النظارة وراها عنين وارمة وحمراااااااااااااااااااااااااااااااة
انتظرونى قريبا ولى عودة ان شاء الله

Monday, October 23, 2006

هل البدر بدرى والايام بتجرىوالله لسه بدرى والله يا شهر الصيام
رمضان خلص بسرعة ملحقناش نشبع منه
الواحد مش عارف يعمل ايه من غير رمضان ...خلاص اتعودنا
انا متأكدة ان كل الناس زعلانة انه خلص
جاء العيد بفرحته وبسكوته وكحكه وغريبته وبيتيفوره
ربنا يجعله خير علينا ويثبتنا بعد رمضان
ويبعد عننا الشياطين ويحمينا من شرور انفسنا وسيئات اعمالنا
جانا العيد اهو جانا العيد
جانا العيد اهو جانا العيد

Friday, October 20, 2006

فى حياتى ماشفتش حد بيحب يأذى نفسه بالشكل ده!!!!!!!! حد شاف حاجة زى كده؟؟؟
واحدة اعرفها بتحب تأذى نفسها بشكل عجيب
هى فى كلية صيدلة يعنى الكلية مدتها 5 سنين هى فعلا بقالها 5 سنين بس لسه فى سنة تانية!!!! والاغرب انه بمزاجها
هى عايزة تسقط فى الكلية مش عايزة تنجح ولو سألتها ليه ترد :" وانا هعمل ايه لما اخلص كلية؟!" ردودها مستفزة
اقولها عشان تشتغلى وتبدأى حياة جديدة تنجحى فى شغلك -لو عايزة- تتجوزى ...اى كلام من ده
تقولى طب وبعدين؟؟؟ انا عايزة اعيش حياتى
المهم ان هى مش بتعمل حاجة مثلا اللى ممكن تقول عليها تعيش حياتها
بتعمل حاجات غريبة فى نفسها كلها غلط وهى عارفة انها غلط ومرتاحة كده
اقولها يابنتى اللى انتى بتعمليه ده غلط تقولى مانا عارفة!!! اقولها طب واهلك؟؟؟
تقولى هم مرتاحين كده!!!! بجد انا ماشفتش حد بالمنظر ده قبل كده
حاجة تجنننننننننننن
شطارة الصيدلى؟؟؟؟؟؟؟؟
حبيت اكتب عن الجملة دى لأنى زهقت من كتر ماسمعتها
عندنا دكتور فى الكلية-ربنا يعمر بيته- بيقولنا الجملة دى بمعدل كل خمس دقايق فى محاضرة مدتها 3 ساعات:
الصيدلى الشاطر هو اللى يعرف امتى يقول للمريض يروح للدكتور
يمكن الكلام ده صح بس مش فى مصر
هنا فى مصر لو دكتور صيدلى قال للمريض روح للدكتور يقولوا عنه دكتور خايب مع العلم ان ده مش تخصص الصيدلى ....لكن تقول لمين؟؟؟؟؟؟؟؟
ساعات بفكر فى الموضوع ده مش ببقى عارفة اعمل ايه لو اتحطيت فى الموقف ده!!!!ياترى هقوله كده؟
مع العلم ان بحكم الدراسة انا مكن ابأى عارفة المريض ده عنده ايه بس دواه مش بيتصرف غير بروشتة وده موضوع تانى
اكتر من نص الادوية اللى الناس هنا فى مصر بتشتريها كده من غير روشتة متنفعش من غير روشتة
بس برضه عشان محدش يقول ده دكتور خايب بيضطر يصرف
لحد امتى هنفضل نكسر القوانين وخصوصا دى اداب المهنة والمهنة دى ممكن تودى فى داهية لو صرفت حاجة غلط
بس برضه عشان مايقولوش دكتور خايب!!!!! تفكير عقيم
للدرجة دى الواحد بيخاف من كلام الناس؟؟؟؟
ما اللى يقول يقول المهم مكسرش اداب المهنة!!!! بس ياترى هقدر على كده ولا همشى مع التيار عشان محدش يقول عنى دكتور خايب

Saturday, October 14, 2006

بسأل نفسى انا عملت المدونة دى ليه؟؟؟؟؟؟؟؟
طول عمرى معايا اجندة عشان الخواطر اللى بكتبها فى المكان اللى انا قاعدة فيه
حتى وانا بره شنطتى (مهما صغرت) مش بيفارقها ورقة وقلم
ممكن فى اى وقت ييجى على بالى حاجة اكتبها وابأى هموت لو ماكتبتهاش
لكن المدونة دى حاجة تانية ....
ده المكان اللى ممكن اكتب فيه عن نفسى وعرف نفسى عن طريقه
لان رأيى ان مفيش انسان يعرف نفسه
لازم يكون فى حاجة نقصاه مايعرفهاش عن نفسه
حاجة جوااااااااااااااااه
يمكن عشان كده حبيت اعمل المدونة عشان اقرا اللى بكتبه بعد شوية
لأن الاجندة بتاعتى نادر جدا لو قريت اللى كتبته فيها
مش عارفة ليه يمكن بخاف .... مش عارفة !!!!!
المهم انى مبسوطة انى عملتها وهستنى اما اشوف هتوصلنى لفين مع نفسى؟؟؟؟؟؟

Friday, October 13, 2006

يعنى ايه الاحساس بالامان؟
اقول لكوا انا يعنى ايه اصله لسه جديد عليا
ايوة لسه جديد....طول عمرى خايفة من حاجة مش عارفة ايه هى بالظبط لحد 3 سنين فاتت حصلت اهم حاجة فى حياتى
الحاجة اللى خلتنى احس بالامان
امان يعنى:
ا:الراحة النفسية
م: مفيش خوف من اى حد ولا اى شئ الا الله عز وجل
ا:انسان خايف عليك اكتر من نفسك تقدر تسيب نفسك براحتك معاه وماتخافش
ن:نوم مرتاح من غير قلق ولا فزع بالليل ان مفيش حد معاك لان دايما هتلاقى حد معاك حتى لو كنت لوحدك هيكون فى حد جواك

عرفتوا بأى يعنى ايه امان؟؟؟؟
ربنا يديمه نعمة على الجميع يارب

Thursday, October 12, 2006

مرة من مرات قليلة فى حياتى احس انى فرحانة وزعلانة ونفسى اعمل حاجة وحاسة بالملل بس ماعنديش وقت احس بالملل
حد فاهم حاجة؟؟؟؟؟؟؟
انا فرحانة عشان رجعت من السفر ودى فى حد ذاتها حاجة جميلة بالنسبة لى لكذا سبب اهمهم انى بشوف اهلى + انى مش بحب القاهرة ولا هى بتحبنى وفرحانة كمان انى عملت المدونة دى عشان اطلع كل اللى جوايا وقت ما احب

زعلانة عشان المنتدى اللى هو اسرتى مش شغال والموضوع ده مضايقنى جداااااااااااااااا وزعلانة كمان عشان الكلية مش رحمانا
كل شوية امتحان من اولها كده والواحد مش عارف يذاكر عشان رمضان اليوم فيه بيطير.....زعلانة كمان عشان رمضان طاااااار

نفسى اعمل حاجة مفيدة سواء فى بورسعيد او فى الكلية او للناس بوجه عام نفسى ابأى انسان فعال فى المجتمع مش عشان ابأى كده وخلاص لأ....عشان انا بجد عايزة اعمل حاجة

حاسة بالملل عشان رتم الحياة الممل نفسى اعمل حاجة جديدة مفيدة غير انى اروح الكلية واتشغل فى الامتحانات والكلام ده كله

حاسة ان دماغى هتنفجر من كتر المواضيع اللى فيها لأن مش هى دى بس المواضيع اللى شغلانى فى حاجات تانية كتير وكل مااحاول مافكرش مش عارفة....

ياترى اخرتها ايه؟؟؟؟؟؟؟؟؟

انا شخصيا مش فاهمة حاجة من اللى كتبته